網紅的藏寶箱涼粉（上）
我對涼粉係有一種情意結嘅，因為細個屋企係唔俾食涼粉，覺得佢唔衛生，但係又時時喺屋企後街，見到個阿伯推住架鐵車，上面有一舊冰，再上面係一舊好大舊嘅涼粉，再再上面鋪咗一個麻包袋喺度叫賣，佢日日係咁買，但係我哋一直都係唔准食！
我諗我第一碗涼粉應該係喺港台做嘢嘅時候！因為實在太根深蒂固，覺得涼粉冇益，食完之後會肚痛！但係食過一碗之後，就控制唔到啦，因為嗰種口感好過癮。所以我係好鍾意食涼粉嘅。
一直以為，涼粉係煲一啲中國藥材，然後好似啫喱咁加啲大菜或者魚膠粉而成。點知，原來涼粉草係天生膠質，只要煲嘅時間足夠，同埋用梳打粉或者鹼水令佢產生化學作用，啲膠質就會走出嚟。
真係學到嘢！
於是我走去買涼粉草，原來咁難買喎！就算係一啲賣藥材嘅舖頭都未必有，終於真係行咗冇10間都有8間藥材舖，俾我搵到嘞。我買咗4両，佢收我$24 ，隱隱然又覺得有直升機喺頭上飛動！伏伏伏伏！唔緊要啦，第一次嘗試，俾人搵吓笨都應該嘅！
滿心歡喜帶着包涼粉草返屋企，諗住煮人生嘅第一轉涼粉，點知更大嘅伏原來喺後面。（待續）
#何嘉麗callmegaga #何嘉麗 #為食路上
#自嘉製 #涼粉 #冰凍涼粉 #冰凍雪糕涼粉
#街邊涼粉擔心唔合衛生
#自嘉製涼粉係非常之不切實際
#自嘉製涼粉浪費時間但係衛生
Search